საქართველოს სოციალურ მუშაკთა ასოციაციამ სოციალური მომსახურების სააგენტოს მეურვეობისა და მზრუნველობის ყველა რეგიონული საბჭოს წარმომადგენლებისთვის 2 დღიანი სამუშაო შეხვედრები გამართა.
ერთი თვის განმავლობაში სულ სამი სამუშაო შეხვედრა შედგა, რომელთა ფარგლებშიც განხილულ იქნა:
ერთი თვის განმავლობაში სულ სამი სამუშაო შეხვედრა შედგა, რომელთა ფარგლებშიც განხილულ იქნა:
- შშმ ბავშვებთან დაკავშირებით მიღებული გადაწყვეტილებების არსებული პრაქტიკა და გადაწყვეტილების ეფექტურობის ხელშემწყობი ფაქტორები;
- შშმ ბავშვების უფლებრივი მდგომარეობა საქართველოში და საბჭოს წევრების როლი უფლებების დაცვის საქმეში;
- შშმ პირებთან მისაღები ტერმინოლოგიის გამოყენებისა და ანტიდისკრიმინაციული პრაქტიკის ხელშეწყობის მნიშვნელობა, ასევე, სტიგმის გავლენა და სოციალური ინკლუზიის ხელშემწყობი ფაქტორები;
- მომსახურების ახალი მოდელი მძიმე და ღრმა შეზღუდული შესაძლებლობის მქონე ბავშვებისთვის - 24 სთ-იან ზრუნვაში განთავსების კრიტერიუმები, მომსახურების ალტერნატიული მოდელი, მულტიდისციპლინური გუნდის მუშაობა, სუპერვიზიის მექანიზმი და ინდივიდუალური განვითარების გეგმაში გასათვალისწინებელი ფაქტორები;
- საბჭოს პასუხისმგებლობა, განსაკუთრებით, ერთპიროვნული გადაწყვეტილებების მიღებისას, ერთიანი მიდგომის მნიშვნელობა და პროცესში ჩართული ყველა მხარის ინტერესების, საჭიროებებისა და ფუნქციების გააზრება;
- არსებული მომსახურებები, პრობლემური საკითხები, რომლებიც საჭიროებს ადვოკატირებას;
- არსებული პროფესიული გამოწვევები და მათი გადაჭრის გზები.
ოჯახში ძალადობის შემცირების პროექტის ფარგლებში სოციალური მომსახურების სააგენტოს სოციალური მუშაკები გადამზადდნენ. 7 დეკემბერს ტრენინგების დახურვის ცერემონიაში მონაწილეობა მიიღო სალომე ნამიჭეიშვილმა, სოციალურ მუშაკთა ასოციაციის დამფუძნებელმა. სალომე პროექტის ფარგლებში თანამშრომლობდა ადამიანით ვაჭრობის (ტრეფიკინგის) მსხვერპლთა, დაზარალებულთა დაცვისა და დახმარების სახელმწიფო ფონდთან და შეიმუშავა სოციალური მუშაკებისთვის ტრენინგ მოდულები. მან და ამერიკელმა ექსპერტმა, მაჰნაზ ჰარისონმა, ჩაატარეს ტრენერთა ტრენინგი, რომლის ფარგლებშიც მომზადნენ უფროსი სოციალური მუშაკები, ხოლო შემდეგ მათ მიერ მომზადდნენ ყველა მოქმედი სოციალური მუშაკი. ამ პროცესში უფროს სოციალურ მუშაკებს დახმარებას უწევდნენ საქართველოს სოციალურ მუშაკთა ასოციაციის ტრენერები, გურანდა თეთრაძე, ნელი აკობია და ნათია მაჭარაშვილი. დახურვის ცერემონიაზე სოციალურ მუშაკებს სიტყვით USAID–ის მისიის დირექტორმა, დუგლას ბოლმა, ჯანდაცვის მინისტრის მოადგილემ, ვალერი კვარაცხელიამ, ადამიანით ვაჭრობის (ტრეფიკინგის) მსხვერპლთა, დაზარალებულთა დაცვისა და დახმარების სახელმწიფო ფონდის დირექტორმა, თამუნა ბარკალაიამ და სალომე ნამიჭეიშვილმა მიმართეს. სალომემ აღნიშნა, რომ სოციალურმა მუშაკებმა შეძლონ რა ეფექტური რეაგირება ოჯახში ძალადობის შემთხვევებზე, მნიშვნელოვანია სწავლების თანმიმდევრული გაგრძელება, ასევე, მათი ინსტიტუციური მხარდაჭერის გაძლიერება სოციალური მომსახურების სააგენტოს მხრიდან. 2012 წლიდან სოციალური მუშაკების ფუნქციები მნიშვნელოვნად გაიზარდა, თუმცა მათი რაოდენობა სისტემაში კვლავ უცვლელი რჩება.