საქართველოს სოციალურ მუშაკთა ასოციაცია 2021 წლის ოქტომბრიდან გაეროს ბავშვთა ფონდის მხარდაჭერით ახორციელებს პროექტს სოციალური მუშაობის ხარისხის გაძლიერება სახელმწიფო ზრუნვის და ტრეფიკინგის მსხვერპლთა დაცვის სააგენტოში (Strengthening the quality of social work at the Agency for State Care and Assistance For the (Statutory) Victims of Human trafficking (SCA)), რომლის მიზანიც გახლავთ სახელმწიფო ზრუნვის სააგენტოს მხარდაჭერა სოციალური მუშაობის გაძლიერების მხრივ.
ასოციაციამ ზრუნვის სააგენტოსთან თანამშრომლობით შეიმუშავა „სექსუალური ძალადობის ამოცნობა - ნიშნები და საფრთხის სიგნალები - დამხმარე დოკუმენტი სოციალური მუშაკებისთვის სექსუალური ძალადობის ამოსაცნობად და შესაფასებლად“, „სექსუალური ძალადობის შემთხვევის სამოქმედო პროტოკოლი სააგენტოს თანამშრომლებისთვის“, „სექსუალური ძალადობის მსხვერპლ/რისკის ქვეშ მყოფ ბავშვთან კომუნიკაცია - საინფორმაციო მასალა სოციალური მუშაკებისთვის“, „ბავშვის სექსუალური განვითარება - საინფორმაციო მასალა სოციალური მუშაკებისთვის“.
აღნიშნული დოკუმენტების მიზანია სოციალური მუშაკების გაძლიერება და მხარდაჭერა, რათა სააგენტომ უკეთ შეძლოს ბავშვთა მიმართ სექსუალური ძალადობის რისკების დროული იდენტიფიცირება და პრევენციაზე მუშაობა; ამ მხრივ, საქართველოს სოციალურ მუშაკთა ასოციაციამ აპრილი ივლისის პერიოდში ჩაატარა ტრენინგები.
ტრენინგი ჩატარდა 8 ჯგუფისთვის. ჯგუფი მოიცავდა საქართველოს მასშტაბით მომუშავე სოციალურ მუშაკებს, იურისტებს, უფროს სოციალურ მუშაკებს, პროფესიულ ზედამხედველებს და ფსიქოლოგებს. სულ ტრენინგი გაიარა 229 სპეციალისტმა, აქედან სოციალური მუშაკი იყო 169, უფროსი სოციალური მუშაკი - 18, პროფესიული ზედამხედველი - 8, იურისტი - 21, ფსიქოლოგი 13, ტრენინგზე ჩართულობის რეგიონალური დაფარვა: სამცხე - ჯავახეთი, კახეთი, იმერეთი, მცხეთა - მთიანეთი, ქვემო ქართლი, შიდა ქართლი, თბილისი, გურია, სამეგრელო - ზემო სვანეთი, რაჭა - ლეჩხუმი - ქვემო სვანეთი, აჭარა. ამას გარდა, სააგენტოს ცენტრალური აპარატი.
პროექტის ფარგლებში ასოციაცია ხელს უწყობს სოციალური მუშაობის გაუმჯობესებული მომსახურების დანერგვას სისტემაში და მის განვითარებას. ამ გზით, როგორც ბენეფიციართა უფლებების დაცვა ხდება, ასევე ხელი შეეწყობა უკეთესი პრაქტიკის განვითარებას და დანერგვას.
